好福利定好老細？獵頭：搵工同搵老公一樣，唔好只揀富二代

在職場上，candidates同clients，其實就好似一段婚姻關係、一對互相依靠的伴侶，大家坐埋同一條船，分擔同一份工作，各司其職。老闆要照顧員工，員工就做好呢份工，大家相處時間之長，有時可能比見家人的時間更多。

「鑽石恆久遠，一顆永留存」又係呢個廣告，真係聽到厭，女神邊畫珠寶設計草圖邊說。作為一個男人，我都好希望俾到一個永久承諾我心愛的人。但女神咁樣講，真係令到我好兩難。

小弟作為一個理性嘅男士，明知鑽石只係一粒石頭，但價錢足以買起我十個限量版模型，條數點計都唔抵。但長遠利益計，又真係覺得抵，因為如果自己心愛的人能嫁給你，是絕不簡單的緣。

試想一下：一個女人未嫁之前，在屋企係公主，嫁咗之後，要懂得如何同老爺奶奶相處，既要顧夫家又要顧住自己屋企，又要工作應對上司同事，無形中多咗一份新工，但人工無變；為了家庭付出，仲要變相減人工，增加工作時間。倘若我買一隻價值十萬的婚戒，換來女神做我五十年老婆；呢條數，真係好抵。

正所謂，老闆好，員工自然好。員工努力工作，老闆就應珍惜好員工。年尾出花紅，就似男人送鑽石俾老婆一樣，但換了是僱主僱員關係時，分別是：作為員工，唔係事必俾你揀個粒鑽石到底有幾大，而係老闆相信你係呢個價值。

通常我都會叫candidates睇長遠少少，搵個好老闆，就如搵個好伴侶一樣，佢好你好。你一味搵富二代，年青富二代想要的，通常是年輕貌美身材玲瓏浮凸個一類，如果有朝一日你的價值隨歲月而遠去，便會失寵，浪費青春。

你搵一份人工高小小，或者公司名氣較高的工去做，很多時就如一心要嫁個富二代，但富二代身邊美女如雲，唔識得珍惜你，就算你係港姐，歲月催人，最終還是有機會失敗收場。

一個好老闆，一份好職業，就如一個好老公、一段好婚姻，道理是同出一轍的。蠢的人會選擇喺寶馬上喊，聰明的人會坐喺單車上努力賺法拉利。

最後女神同我講，希望將來可以收到一粒有特別意義的戒指，唔一定係鑽石，有可能係一粒寶石，設計意義更重要。

「你唔怕第日後悔自己沒有要到一粒大鑽石？」我問。

「唔怕，童話入面，王子同公主結婚，都是偉大的愛情故事，但從沒提過求婚戒指有幾大。」女神答完輕輕一笑。